محادثه شعريه بين بنت وولد

زائر

محادثه شعريه بين بنت وولد!!

البارحه جاني من الحب مرسال .
‏ من بعد مابيني وبينه خصيمه¤

وأنا ترى بالحب مانيب فعال.
ولا بعد ولع بقلبي هشيمه¤

ولا بعد غنيت في ساعة وصال.
ولا بعد ذقت الفراق وجحيمه¤

ولابعد جرى دمعي على الخد همال.
ولابعد جربت مر الهزيمه¤

حتى وردني تالي الليل جوال.
وأنا على شاهي وبسكوت ديمه¤

الرقم بايخ لاكن الصوت قتال.
كنه مثل صوت المذيعه حليمه¤

قالت مساء الخير ياطيب الفال.
قلت أرحبي ترحيبتآ مستديمه¤

بالعود والصفري ودله وفنجال.
واجبك يابنت الأصول الكريمه¤

ردت بضحكه ثم قالت ويش الحال.
قلت أشهد أن الحال عقبك سقيمه¤

قالت وهي تضحك بعد مثل الأطفال.
وأنا بعد كني بدونك يتيمه¤

من يوم قالتها ترلزلت زلزال.
من فجعتي كني مسوي جريمه¤

قلت أرفعي صوتك ترى مابه أرسال.
كذاب لاكن المصيبه عظيمه¤

قالت أقول أسمع ترى هرجنا طال.
ممكن تصاحبني تراني وسيمه¤

واسمي الحقيقه أول حروفه الدال.
لكن يسموني البنات الزعيمه¤

صحيح أحب الفخفخه وأعشق المال.
لكن تراني طاهره مستقيمه¤

ماعندي مغازل ولالعب بهبال.
ماعندي إلا في الشرف والحشيمه¤

بس الصراحه قلبي لشوفتك مال.
وأصبحت وحدك جالسآ في صميمه¤

فكر بعقلك وأترك القيل والقال.
واحذر تطيع أهل القلوب العقيمه¤

وأرسل علي الحين خمسمية ريال.
أشحن بها جوال أختي نعيمه¤

أوطقم غالي فيه خاتم وسلسال.
أروح به في عرس ولا عزيمه¤

قلت الحقيقه مانيب رجال أعمال.
ولاني بتاجر والموارد عديمه¤

أنا الصراحه شبه عطال بطال.
وعلاقتي بالفقر جدآ حميمه¤

والراتب الله يرحم الحال مازال.
محدود والمصروف ربي عليمه¤

والدين بالآلاف والبنك شغال.
ياكل فلوسي بالربا والظليمه¤

والسوق طايح والغلا ضيق البال.
والموت والله صاير أكبر غنيمه¤

قالت تحمل بس والحمل ينشال.
خلك شديد الباس صلب العزيمه¤

ياخي تصرف جعلك تصير نشال.
أهم شي أن النوايا سليمه¤

لابد تفهمني على كل الأحوال.
مادمت من أهل العقول الفهيمه¤

قلت أيه والله فاهم اللي على البال.
لكن ترى هذي علينا قديمه¤

يابنت هذا صاير اليوم موال.
للي تبي تلعب على ابن اللئيمه¤

يابنت ماتدرين كم فيه محتال .
يلعب على الحبلين وأنتي غشيمه¤

يابنت كم من جاهله دمعها سال.
‏ من عقب ماجات العواقب وخيمه¤

والبنت لا أقفى عرضها بيد الأنذال.
والله مايبقى لها أي قيمه¤

قالت تبي ولا فخلك رجال.
مهوب ناقصني نصايح حكيمه¤

عز الله أنك للأسف ما أنت رجال.
وأنك قليل الذوق مافيك شيمه¤

يالعنبو اللي مايسطرك بنعال.
حتى يعلمك الغزل يابهيمه¤

‏(تفو)عليك وصكت الخط بالحال.
مدري (تفو) هي مدح ولاشتيمه

زائر

شكرا نور فلسطين
يعطيكي العافية